CONCORS PAR TESCJ CINEMATOGRAFICS IN LENGHE FURLANE 2008

VII edizion

Regolament

1 - E je stade fissade la VII edizion dal Concors par tescj cinematografics in lenghe furlane.

Il concors al à chê di prudelâ la scriture di storiis par films e senegjaturis, di articui di critiche e di saçs cinematografics par furlan, deventant cussì une palestre par autôrs e critics di cine.

2 – Il concors al sarà dividût in cuatri sezions:

Sezion a) dedicade aes senegjaturis;

Sezion b) dedicate aes storiis par film;

Sezion c) dedicade ai articui di critiche;

Sezion d) dedicade ai saçs sul cine.

Une jurie e sarà istituide par dâ chescj premis:

Sezion a)

prin premi € 1.500

eventuâls segnalazions

Sezion b)

prin premi di € 300

segnalazions

Sezion c)

prin premi € 300

segnalazions

Sezion d)

prin premi € 300

segnalazions

La jurie, li che no ritegni valevul nissun dai lavôrs presentâts, e pues decidi di no dâ cualchidun o nissun dai premis stabilîts.

Lis voris premiadis a vignaran publicadis su la riviste anuâl di cine Segnâi di lûs. Dut câs, a podaran vignî publicadis su la stesse riviste ancje chês segnaladis e chês ritignudis plui interessantis, tal stes an o in agns seguitîfs.

3 – A son ametûts in concors dome i lavôrs in lenghe furlane, scrits di un o plui autôrs. Lis senegjaturis a àn di jessi scritis in furlan comun e inte grafie uficiâl pes parts tecnichis e descritivis

(a son ametudis lis varietâts pes parts dialogadis simpri tal rispiet de grafie uficiâl).

Lis storiis par film, i articui critics e i saçs a varan di jessi scrits in furlan comun e inte grafie uficiâl.

Lis voris a varan di jessi presentadis rileadis, cu lis pagjinis numeradis e datiloscritis.

Ogni concorent o grup di concorents al pues partecipâ dome cuntun lavôr par ogni sezion.

4 – No son ametudis al concors lis senegjaturis o lis storiis di films che a son za in lavorazion ae date di assegnazion dai premis.

5 – Par partecipâ al concors, i lavôrs a varan di jessi o inviâts par pueste (si tignarà cont dal timbri postâl) o consegnâts a man, in dople copie, li dal Centro Espressioni Cinematografiche in vie Vilalte, 24 a Udin UD, dentri dai 15 di Setembar dal 2008.

Lis voris a partecipin al concors in forme anonime fin ae fin dai lavôrs de comission judicante.

Par garantî l’anonimât, i concorents a varan di segnâ lis lôr voris dome cul titul, evitant ogni pussibile identificazion dal o dai autôrs. Tal câs di spedizion par pueste si à di segnâ, sei tant che mitent sei che tant che destinatari, la direzion dal CEC.

La vore, metude intune buste sierade, e à di jessi compagnade di une seconde buste sierade cun dentri lis gjeneralitâts, la direzion e i numars telefonics dal autôr o dai autôrs, dutun cuntune declarazion che e certifichi, sot de responsabilitât dal concorent, che il lavôr mandât no i va cuintri aes normis di chest regolament, regolament che al ven automatichementri acetât dai partecipants biel che a mandin la opare al concors e une declarazion par autorizâ il CEC a publicâ a gratis la vore, fale eventuâi dirits di autôr leâts ae realizazion des storiis e des senegjaturis in film.

6 – Ducj i dirits dai lavôrs in concors, ancje chei segnalâts e premiâts, a restin a ducj i efiets di proprietât dai autôrs. I datiloscrits mandâts no vignaran tornâts indaûr e a restaran a disposizion dal archivi dal CEC.

7 – La jurie e concludarà i lavôrs dentri dal mês di Otubar dal 2008 cu la selezion des voris. La cerimonie di premiazion si davuelzarà inte suaze di une serade speciâl che si tignarà tal mês di Dicembar dal stes an.

8 – Tal câs li che lis senegjaturis o lis storiis premiadis a vegnin realizadis in film, i vincidôrs si impegnin a segnalâ il Concors tai titui dal film stes.